iklan

Cloud Hosting Indonesia

Iklan

iklan

terkini

Foto jadi saksi sejarah

28/12/2021, 11:36 WIB Last Updated 2021-12-28T04:36:50Z
BASA JAWANAN YA LUR!

Foto jadi saksi sejarah

Dina Senen Pahing tanggal 27 Desember 2021 salubare sembahyang dhuhur, panggonane nang ruang kantore Kepala Bidang Dinas Pendidikan dan Kebudayaan Dra. Sri Hartati, Um Dhimas Riyanto, nyeritakna yen awake dewek tau nduwe kesan apik, sing nganti saiki ora bisa diklalenaken, yakuwe gara-gara kanca wadonne sing arane Teti jaman sekitar taun 1980-an, nang daerah Tamansari Atas Bandung, deweke nyilihna novel karangane N.H. Dini. Jebule, lagi dislonongaken, nang tengahe buku ana potone wong wadon, sing gara-gara kuwe Um Dhimas dicecer, “kiye lugune wong wadone sapa?”.  Nah, gara-gara poto mau, sing Um Dhimas sajujure ora ngarti sebabe sing ndalahi sapa, tapi sing jelas gara-gara poto mau, hubungane dadi ora apik, kongkrite gawe cemburu, taroke dugal, ganti pacar maning.

Sejen maning karo Mas Dyanindra Sri Kumara, kuwe nduweni pendapat sing sejen maning, yen gunane poto kuwe nggo mbuktikna, yen barang sing dipesen wis dikirim, anjog ning alamat sing dituju, terus ana potone. Dadine, wong sing pesen teteg, bombong, sebab lancar kaya sing dimaksud. Senajan Mas Nindra lagi enom, karo wong sing saiki dadi bojone, kuwe ya tau ijol-ijolan poto. Semono uga sing dialami daning Mas Ade Nova Kusuma Kepala Seksi Sejarah sing dadi panitia lomba poto sing temane “Wajah Baru Kota Tegal” sing dianakna lagi dina ulang taune KORPRI sing kaping 50. Lomba mau bisa dimeluni sapa bae, sarate kudu ngelampiraken bukti yen deweke warga negara Indonesia, seneng motret, toli duwe Kartu Tanda Penduduk (KTP). Poto sing dilombakna kudu dipotret antara tanggal 1-27 Desember 2021, lokasine ning kawasan Jalan Pancasila tekan Alun-alun Kota Tegal. Sing pada melu, diwajibaken ngunggah potone nang akun Instagrame dewek karo mein tagar #wajahbarukotategal, #hutkorpri, #heritagekotategal.

Tapi, kanggone Ibu Heny Indriany sing dadi dosen nang Politeknik Purbaya Kabupaten Tegal, deweke nambahi yen bab poto kuwe penting nemen kanggo dadi saksi sejarah, awit kanggo keluarga, masyarakat, karo negara. Nggo mbuktikna, Bu Heny crita yen wong sing arane Alexiux Impurung Mendur karo adine sing arane Frans Sumarto Mendur, loro-lorone warga Kawangkoan, Sulawesi Utara, kuwe nduwe jasa gede tumrape negara Republik Indonesia, sebab deweke sing motret waktu proklamasi kemerdekaan. Malah, keadaan kiye ndadekaken wong loro mau nampa Bintang Jasa Utama lagi tanggal 9 November 2009, sebab jasa poto jurnalistikke. Ora tanggung-tanggung, Presiden Republik Indonesia Susilo Bambang Yudhoyono uga mein Bintang Mahaputera Nararya tanggal 12 November 2010. Ning desane wong loro mau, uga digawe monumen kanggo ngormati tempat laire nang Kawangkoan.

Bu Heny esih nerusaken critane, yen wong gelem temenanan, anggone nekuni pegaweane, bisa kondang nang jagad, termasuk nang bab potograpi. Mulane, sapa ngerti, saka lomba sing dianakna daning Pemerintah Kota Tegal bisa nggugah semangate bocah enom sing kasebut ‘generasi milenial’ endah luwih tekun anggon sinau nambahi ilmu nang bab potograpi. Wis ake contone, kabeh asale sing ngingsor ndisit. Ora langsung ujug-ujug, ndadak dadi kondang ning jagad. Wis, contone potograper Nadav Kander sing kondang sebab poto-potone sing temane ‘Obama’, dimuat nang New York Times taun 2008, semono uga Richard Kalvar sing potone bisa nggugah imajinasine wong sing pada ndeleng nganti takjub, malah ana sing mesem-mesem, terus Richard Avedon, Hiroji Kubota saka Jepang, Pieter Hugo saka Afrika Selatan, Vivian Maier, Mary Ellen Mark, Annie Leibovitz, karo Jean Gaumy. Malah ning Indonesia, kanggo wong wadon sing minat dadi potograper uga bisa kondang ning forum nasional, kayatah: Diera Bachir, Rossie Hardy, Nicole Patricia Malina, karo Andra Alodita.

Wong enom saiki uga akeh sing nduweni hobi motret, apa maning wis akeh hape sing nduwe kamera canggih-canggih, dadi ora patia kangelan anggone pan motret sing apik. Kayatah Mba Arinda Putri Anugrahani, Mba Ummi Sarah Adiba, Mba Adistya Pratiwi, malah deweke nyeritakaken yen awit jaman kuna, keluargane nduwe poto buyute. Kuwe manfaate gede nemen, sebab senajan ora ngalami taun lagi uripe, deweke bisa krungu critane saka wong tuwane, yen simbah jaman kuna tau olih amanah dadi lurah, kiyeh potone waktu simbah bareng-bareng dijukut gambare, dipotret karo ndoro kanjeng bupati nang ngarepe pendopo. Sebab, beneran nang antarane lurah utawa kades sing ana, deweke dadi glondong, utawa ketuane para lurah.

Lagi pas anjog obrolan kuwe, jebule Um Farkhendi karo Um Sengsong alias Nur Sidik Soleh Anwar sing Komite Sastra Dewan Kesenian Kota Tegal, wong loro mau nakokaken sarat sing dadi pedomane para juri anggone nemtokna sing dadi juara, kuwe apa? Aku terus njawab, “kiyeh, Mas Endy karo Mas Sengsong, panitia karo dewan juri sing antarane: Mas Oky Lukmansyah, Fotografer LKBN Antara, Mas Adi Mulyadi, Editor Radar Tegal, terus aku dewek, wis dimein pedoman nang panitia, nang Mas Nova, Mas Yuli, yen kriteria sing dipilih kuwe kudu sing nduweni ide sing anyar, asli dudu plagiat, ora nyimpang saka temane, potone cerah, mencorong, teknik pemotretane ya yakher”.

Barang Um Endy takon, “kiye lugune idene sapa?”, jawabane ‘Kabid Kebudayaan, Ibu Dra. Sri Hartati’, ngomong yen kiye idene walikota, maksude ora liya nggo ngenalaken Taman Pancasila, Tower Waterleideng, Alun-alun sing nembe dibuka, terus Lawang Satus utawa Gedung SCS (Semarang-Cheribon Stramsoom Mastjhapij). Muga-muga, kegiatan lomba poto “Wajah Baru Kota Tegal” bisa nambahi semangate warga Kota Tegal, utamane generasi milenial, endah nduweni bukti-bukti sejarah sing mbesuk bisa kanggo crita maring anak, putu, buyut, canggah, wareng, udeg-udeg, gantung siwur, gropak sente, sebab poto bisa dadi saksi sejarah. (*)

Atmo Tan Sidik, Pembina Rumah Literasi Waskita
Komentar
Komentar sepenuhnya menjadi tanggung jawab komentator seperti diatur dalam UU ITE. #JernihBerkomentar
  • Foto jadi saksi sejarah

Terkini Lainnya

Iklan